> ## Content Index
> Fetch the complete content index at: https://www.5news.com.hk/llms.txt
> Use this file to discover other available public pages before exploring further.

# 過渡性房屋|啟福居入住率<26.6%?
- URL: https://www.5news.com.hk/kai-fook-kui-case/
- Published: 2025-06-09T14:05:12.000Z
- Updated: 2025-06-09T14:07:14.000Z
- Description: 香港行政長官林鄭月娥喺2018年6月29日宣佈咗6項新房屋措施，其中一項就係過渡性房屋計劃。當時樓市熾熱，公屋輪候人數同時間都不斷攀升。過渡性房屋計劃原意係為咗劏房戶可以喺入住公屋前有一個暫緩之所。
- Author: 5News編輯部
- Tags: 社區關注, 全部

過渡性房屋計劃原意係為咗劏房戶可以喺輪候入住公屋前有一個暫緩之所。政策是以劏房居民為對象，理應係德政。咁點解啟福居入住率唔夠3成，係咪事實？其他過渡性房屋又係咪咁呢？

![香港行政長官林鄭月娥喺2018年6月29日宣佈咗6項新房屋措施。(資料來源：香港特區政府)](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2025/06/image-19.png)

香港行政長官林鄭月娥喺2018年6月29日宣佈咗6項新房屋措施。(資料來源：[香港特區政府](https://www.info.gov.hk/gia/general/201806/29/P2018062900710.htm))

## 房屋局：過渡性房屋流轉率達150%

「政府一直全力推動『過渡性房屋』發展。截至2025年2月底，我們已推出約18 400個單位供有需要的人士申請，而餘下約2 700個亦會在今明兩年內落成。部分單位已經流轉供第二批居民入住，流轉率達150%。」睇返[房屋局網站](https://www.hb.gov.hk/tc/policy/housing/policy/transitional/index.html)形容，過渡性房屋似乎反應唔錯。

## HOY TV報導：啟福居8宗罪

HOY TV電視節目報導，位於啟德，由齊惜福管理嘅啟福居，入住率唔夠3成。節目中，訪問咗唔少住客同街坊，數出8項令住戶困擾嘅問題。

![HOY TV電視節目報導啟福居，住客同街坊，數出8項令住戶困擾嘅問題。(資料來源：電視截圖)](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2025/06/4.---------------------5-.png)

HOY TV電視節目報導啟福居，住客同街坊，數出8項令住戶困擾嘅問題。(資料來源：電視截圖)

| 問題類別   | 報導描述                                      |
| ------ | ----------------------------------------- |
| 環境衛生惡劣 | 走廊曾出現 尿液、蟑螂、昆蟲及老鼠，影響生活質素                  |
| 管理費爭議  | 需額外支付$400管理費，原稱「清潔費」，但環境未見改善              |
| 突收差餉   | 原本以為租金已包埋差餉，但後來先被通知需額外繳交，加重經濟壓力           |
| 缺乏基本電器 | 需自行購買家電（熱水爐、冷氣機、洗衣機、雪櫃），額外支出多$1-2萬，增加財政負擔 |
| 需購指定電器 | 需購買指定容量僅15L嘅電熱水爐，團購價$3400，冬天時熱水不足         |
| 設施未兌現  | 飯堂、洗衣房、圖書館及學習室未投入運作，住戶感到失望                |
| 停電問題   | 近三個月內停電三次，影響日常生活，住戶質疑管理方未有妥善處理            |
| 單位設計問題 | 部分單位由兩個2人單位合併，多了一套廚廁，空間未能有效利用             |

### 部份住戶更寧願住劏房 

部分啟福居住戶寧願揀返劏房，皆因租金呎價相近，兩者都係$34/呎，但劏房優勢明顯：

- 包家電：業主已備冷氣、熱水爐、洗衣機呢啲基本電器，唔使額外花錢買！
- 無額外費用：劏房冇管理費、包差餉，一個租金已包哂基本入住要求，財政負擔更明確！

| 項目   | 啟福居         | 劏房      |
| ---- | ----------- | ------- |
| 面積   | 130呎        | 約150呎   |
| 租金   | $4440       | 約$5200  |
| 呎租   | $34.15      | 約$34.66 |
| 基本家電 | ❌自購         | ✅已附     |
| 管理費  | ❌$400       | ✅無管理費   |
| 額外費用 | ❌需支付差餉      | ✅包差餉    |
| 環境衛生 | 蟑螂、老鼠、尿液等問題 | 環境狀況參差  |
| 設施   | 未投入運作       | 無公用設施   |
| 交通   | ✅鄰近港鐵站      | 按地段而定   |

住戶計過，成本、設備、環境、靈活度，點都係劏房較為划算，難怪寧願租劏房！

### 點解同區啟德‧東寓入住率>97%

節目亦都比較咗同啟福居同區嘅啟德‧東寓。啟德‧東寓入住率達到97.3%。咁大分別，除咗上面所講嘅問題，仲有其他實際原因令住客揀咗啟德‧東寓！  
以3-4人單位重點比較：

| 項目 | 啟福居             | 啟德‧東寓      |
| -- | --------------- | ---------- |
| 面積 | 260呎            | 226呎       |
| 租金 | $8880           | $6015      |
| 呎租 | $34.15          | $26.62     |
| 特色 | 兩個2人單位合併，多咗一套廚廁 | 可放兩張床，一廳一廁 |

- 呎租差距大：$26.62比$34.15平咗近2成。
- 單位設計：啟德‧東寓一廳一廁換嚟放到兩張床，感覺更實用。

### 齊惜福管理問題?

齊惜福喺佢哋[網站](https://www.foodforgood.org.hk)介紹自己係一間2013年2月24日啟動嘅非牟利機構，營運梗2個過渡性房屋計劃，分別係2023年落成嘅荃福居同今次主角啟福居。睇返房屋局3月份[回應立法會嘅提問](https://www.legco.gov.hk/yr2025/chinese/fc/fc/w%5Fq/hb-c.pdf)，指截至2025年2月，最高入住率嘅過渡性房屋正正就係荃福居，達到100%。咁大反差，似乎唔可以完全歸咎係齊惜福管理同經驗上。  
再翻查區議會文件，啟福居唔只過渡性房屋，仲包括埋社區廚房、飯堂、多用途活動室⋯⋯等呢啲功能。似乎係配套未能跟上，令到今次事情發生。

## 5News評論

其實，過渡性房屋原意係一個好好嘅idea。劏房環境惡劣，尤其係有小朋友嘅家庭，過渡性房屋可以令小朋友有更好嘅學習同成長嘅空間。  
可惜，當配套未完善嘅時候，當局應該協助解決問題。對於低收入家庭，就算一百幾十，都會係好重嘅負擔。  
希望藉着今次事件，當局同各個營運者都能夠汲取教訓，令大眾有一個安樂窩。