> ## Content Index
> Fetch the complete content index at: https://www.5news.com.hk/llms.txt
> Use this file to discover other available public pages before exploring further.

# Van Cleef & Arpels|Heures Florales 將「讀時間」變成一場表演｜花開先知幾點？
- URL: https://www.5news.com.hk/van-cleef-arpels-vca-heures-florales-how-to-read-time/
- Published: 2026-02-15T02:06:22.000Z
- Updated: 2026-02-15T02:06:21.000Z
- Description: 第一次見 VCA Lady Arpels Heures Florales，點解連幾點都睇唔明？本文以展覽現場觀察，拆解花朵開合顯示小時、分鐘被刻意移走至錶側的設計邏輯，分析 Van Cleef & Arpels 如何將讀時間轉化成一場機械表演。
- Author: 5News編輯部
- Tags: #Van Cleef Arpels, Van Cleef & Arpels, 全部

## 多數人認識嘅 VCA 腕錶，其實一眼就睇得明

提起 Van Cleef & Arpels（VCA 梵克雅寶）嘅腕錶，不少香港讀者第一時間都會諗起 Alhambra® 系列。四葉幸運圖騰自 1968 年面世以來，一直被視為品牌最具代表性嘅設計之一。腕錶版本亦延續珠寶系列嘅視覺語言——錶面清楚、時間易讀，同時可以同 Alhambra 珠寶作整體配搭。

![Alhambra 腕錶以四葉幸運圖騰為設計核心，屬於 VCA 最容易理解、亦最接近傳統時計讀法的系列。](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2026/02/1.JPG-2.webp)

Alhambra 腕錶以四葉幸運圖騰為設計核心，屬於 VCA 最容易理解、亦最接近傳統時計讀法的系列。

不過，並非所有 VCA 腕錶都以「一眼睇清時間」為設計前提。有部分作品反而刻意淡化即時讀時功能，將重點放喺機械動態同敘事體驗之上。Lady Arpels Heures Florales Cerisier，正正就係其中一個最極端、亦最具代表性嘅例子。

## 呢隻錶第一眼，真係唔知點睇時間？

第一次喺展覽現場見到 Lady Arpels Heures Florales Cerisier，最直接嘅感受唔係「而家幾點」，而係——「咦？點睇時間？」錶面冇傳統時針、分針，亦冇數字刻度，取而代之嘅係 12 朵立體花朵鋪滿整個錶盤。

![錶面沒有指針或數字，小時需透過數清楚有幾多朵花正在盛開來判斷。](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2026/02/2.JPG-2.webp)

錶面沒有指針或數字，小時需透過數清楚有幾多朵花正在盛開來判斷。

單靠靜態畫面，其實好難即時理解呢隻錶嘅讀時方式。直到整點一到，花朵開始慢慢開合變化，先會明白設計背後嘅想法。

![斜角觀看可見花瓣層次與立體結構，花朵並非固定位置，而會隨時間重新組合。](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2026/02/3.JPG-1.webp)

斜角觀看可見花瓣層次與立體結構，花朵並非固定位置，而會隨時間重新組合。

## 花開先知幾點：小時其實藏喺花朵之中

Lady Arpels Heures Florales 嘅「小時顯示」，並唔係靠指針，而係靠花開數量。每逢整點，錶面 12 朵花會按既定程式開合，而盛開嘅花朵數目，就代表當下嘅小時。

表面睇落，花朵開合次序好似隨機；但實際上，機芯內部設有三組循環模式，令同一個時間點喺唔同日子，都有機會見到唔同花序。呢種「看似隨機、實為程式化」嘅設計，令讀時間變成一個需要等待同觀察嘅過程。

## 唔係魔術，而係精密機械

展覽現場其中一個最具說明力嘅部分，係放大展示花開錶盤內部結構嘅裝置。參觀者可以親手操作，直接睇到花瓣點樣隨住齒輪同凸輪結構開合。

![](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2026/02/4.JPG.webp)

展覽現場設有放大機械結構，讓參觀者手動操作，理解花朵開合背後的精密機械原理。

整個系統涉及超過 160 個可動元件。花朵「收合」時動作相對緩慢，而「盛開」時則較為迅速，模擬自然界花開花謝嘅節奏。設計靈感源自「花鐘」（Flower Clock）概念，將植物每日開合嘅規律，轉化成機械時計語言。

單靠相片，其實好難即刻解讀 Heures Florales 嘅時間顯示邏輯。  
VCA 官方影片示範整點時花朵實際開合過程，答案會喺畫面中慢慢浮現。

0:00 

/0:28 

1× 

VCA 官方示範：Lady Arpels Heures Florales Cerisier 花朵開合

## 分鐘去咗邊？原來被刻意移走

如果話 Heures Florales 將「小時」交畀錶面表演，咁「分鐘」就被刻意安排到一個更低調嘅位置——錶殼側邊。

![分鐘透過錶殼側邊的線性刻度顯示，以垂直指針沿 0–60 讀取，避免干擾錶面花朵動態。](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2026/02/6.JPG-2.webp)

分鐘透過錶殼側邊的線性刻度顯示，以垂直指針沿 0–60 讀取，避免干擾錶面花朵動態。

從佩戴角度睇，呢個安排其實幾實際。日常生活中，大部分人對「而家大約係幾點」其實已有概念，反而一個鐘入面嘅分鐘數，好難單靠感覺準確估到，往往要特登望一望先知。將分鐘顯示設於錶側，佩戴者只需手腕自然垂低，毋須特意抬高手臂，都可以快速讀取分鐘。

同時，呢種低調讀時方式，亦減少頻繁望錶嘅動作，喺某啲場合之下，更顯從容。分鐘退居側邊，既保留實際功能，亦避免打斷錶面作為「表演舞台」嘅整體觀感。

## 將「讀時間」變成一個需要解碼嘅過程

喺 Heures Florales 身上，讀時間唔再係一個即時反應，而係一個需要理解規則、耐心觀察嘅過程。佩戴者唔係隨時低頭確認幾點，而係等時間出現，再慢慢「讀懂」時間。

而呢種設計思路，其實並非 Heures Florales 獨有。 

## 將時間藏起來，其實唔止呢一隻錶？

如果話 Heures Florales 將時間藏喺花朵之中，咁同場展覽中另一件作品，第一眼睇落，甚至未必會被當成一件時計。

單靠外觀睇，佢更似一件藝術裝置。好多人第一時間會被丘比特從羽毛籃子中徐徐升起嘅畫面吸引，而忽略一個問題——如果佢係一件時計，時間究竟喺邊度？

![Naissance de l'Amour 自動機械裝置（正面）丘比特從羽毛籃子中徐徐升起，時間顯示被隱藏於裝飾元素之中，並非即時可辨。 ](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2026/02/7.JPG-2.webp)

Naissance de l'Amour 自動機械裝置（正面）丘比特從羽毛籃子中徐徐升起，時間顯示被隱藏於裝飾元素之中，並非即時可辨。 

## 答案，其實藏喺細節入面

當視線由整體移向細節，會發現時間顯示其實被安排喺裝飾元素之內。

![Naissance de l'Amour 時間透過旋轉刻度環及兩根飾有鑽石的彩漆羽毛指示，並由鑲鑽蝴蝶結固定。](https://storage.ghost.io/c/3a/55/3a558e15-07f0-4658-8806-c5a29d8cc457/content/images/2026/02/8.JPG-1.webp)

Naissance de l'Amour 時間透過旋轉刻度環及兩根飾有鑽石的彩漆羽毛指示，並由鑲鑽蝴蝶結固定。

時間並冇消失，而係被巧妙地藏起來，等待被發現。呢類設計再次反映 VCA 嘅一貫取向：時間唔一定要被「強調」，有時反而可以成為探索體驗嘅一部分。

## 結語：當時間唔再只係用嚟睇

Lady Arpels Heures Florales Cerisier 並非為追求實用或高效率而生。佢將讀時間轉化成一場短暫嘅表演，提醒佩戴者——時間唔一定只係一條直線，而係由重複、變化同等待所組成。

對習慣即時讀時嘅人嚟講，呢隻錶或許「唔算方便」；但對欣賞高級製錶敘事同機械美學嘅人而言，Heures Florales 示範咗另一種理解時間嘅方式。你又會唔會，開始期待下一次花開，會開邊幾朵？