芬蘭Levi玻璃屋|漫天星空 Jacuzzi 北極光舞動 馴鹿陪食飯✨❄️💑

🌌 人生圓滿的北極光奇遇記

我喺2024年11月尾至12月初展開呢段旅程，親眼見到北極光喺天幕上跳舞，嗰種震撼真係令人五體投地，心入面湧現一種「人生圓滿」嘅感動，好似完成咗夢想清單上最重要嗰一項！

呢度靚到令人尖叫——無論係喺玻璃屋望星空、浸住熱水池睇光影、定係喺雪地上同馴鹿互動，每一刻都好似置身仙境。

等我慢慢同大家分享點解 Northern Lights Ranch 會成為我心目中最夢幻、最值得一去嘅北極光聖地，包你睇完之後即刻心郁郁，想拎行李飛去芬蘭，親身感受呢份震撼同浪漫！✨

✈️ 點解會揀呢間酒店？

講返點樣揀到 Northern Lights Ranch 呢間夢幻酒店，其實都經歷咗一輪研究同取捨。

由香港出發，直航只可以飛到芬蘭首都赫爾辛基（Helsinki, HEL），但市中心光害太重，睇北極光嘅機會低好多。第一次去芬蘭嘅遊客，點都要去朝聖聖誕老人村，睇睇佢嘅屋企同office，所以我一早就計劃好轉機去羅瓦涅米（Rovaniemi, RVN）—聖誕老人村所在地。

一開始我主力睇 Rovaniemi 附近嘅酒店，心入面有個堅持：一定要有 jacuzzi，可以邊浸熱水邊望住室外靚景，咁先夠 chill、夠浪漫！

我最想住嘅係

• Glass Resort（玻璃度假村）：房型有附熱水 SPA，設計超靚，但唔好彩，已經 full booking！
• Santa's Igloos Arctic Circle（北極圈聖誕老人冰屋）：房型係 Premium Igloo with Hot Tub，當時Agoda 價錢係 EURO 1,051 一晚，我只成功訂到一晚！

到Book果時，呢兩間熱門酒店都已經Waiting List。因為住唔到心儀酒店，我就再向北搵其他選擇，最後就搵到 Levi 嘅 Northern Lights Ranch，完美符合我jacuzzi + 靚景 + 高機率睇到北極光嘅所有要求！

🌃 地理位置優勢：零光害雪原，完美追光

基於之前提到嘅原因同要求，加上我真係好希望可以喺玻璃屋入面直接睇到北極光，唔使凌晨天寒地凍咁，再去參加當地追光團（編按：Lapland Aurora Safari 拉普蘭極光獵遊呢類追光團坐車出去追光有另一番風味），所以我決定再向北搵一間更理想嘅酒店。

最後我鎖定咗芬蘭北部一個好出名嘅滑雪勝地——Levi（利維）。由 Rovaniemi 出發，要坐大約兩個半鐘頭巴士先到，沿途都係雪白世界，已經令人期待爆棚！

而我揀住嘅 Northern Lights Ranch，就隱藏喺 Levi 滑雪場外 15 公里嘅雪地秘境之中。四周完全冇光害，夜晚漆黑一片，靜得嚟又壯麗，北極光一出現就好似 8K 畫質咁清晰，靚到令人窒息！🌌

交通攻略

香港(HKG)→ 赫爾辛基(HEL) → 羅瓦涅米(RVN)→Levi

✈️ 機票：小編今次乘搭寰宇一家嘅芬蘭航空（Finnair）

• AY0100：香港 → 赫爾辛基 (HEL) 21:35–05:30
• AY0531：赫爾辛基 → 羅瓦涅米 (RVN) 07:05–08:35

🛬 如果唔打算去聖誕老人村（Rovaniemi），其實可以由 HEL 轉機去 Levi 附近嘅 Kittilä Airport（基蒂萊機場），會更近酒店，更慳時間同車費！

🚌 巴士：羅瓦涅米去Levi

• F43 巴士班次：17:10 出發（Rovaniemi linja-autoasema）→ 19:45 到達（Levi Hissitie）
• 車程約 2 小時 35 分鐘，票價約 EUR 26.90（約:$240港幣)

🔗 巴士預訂官網推薦

• Matkahuolto：支援英文介面，可選班次及座位
• OnniBus：有時有優惠票，同樣支援線上預訂

Levi市區去酒店

• 11月至3月，有接駁車接送
  • 酒店至Levi資訊中心（上午10:15）
  • Levi資訊中心至酒店（下午3:30）
• Uber大約15分鐘車程

🌌 北極光親身經歷：震撼到入心靈

講真，睇北極光係我人生其中一個夢想，而今次喺芬蘭 Levi 嘅 Northern Lights Ranch (平均每晚房價 EUR 720) ，終於圓夢，仲震撼到我心入面起晒漣漪！

第一晚

天氣唔太合作，零下20度，天空多雲到連星星都睇唔到，心情有啲失落。

第二晚

完全唔同，天空清澈得好似一塊藍寶石，我喺床上望住漫天星星，浪漫到好似置身童話世界。

因為太靚，我半瞓半醒咁躺喺床，心入面又驚錯過北極光出現嗰一刻。

同行攝記一直緊貼住 My Aurora Forecast & Alerts呢隻App，突然之間佢大叫：「佢嚟啦！」我即刻 9 秒 9 換好衫衝出房門，唔想隔住玻璃，只想用肉眼親眼見證。

極光出現嘅瞬間

當時大約係晚上 9 點，天邊出現一束束微微白霧般嘅光垂直擺動，我哋都唔肯定係眼花定真係北極光。好彩事前有芬蘭留學朋友教路，用手機望就知龍定鳳。果然，相片入面清楚見到一束束綠光，確認咗奇蹟降臨！

我哋即刻帶齊腳架，衝去酒店嘅 common area 追光。四周杳無人煙，感覺好似全世界只剩我哋兩個，靜靜地望住北極光越來越強烈，連肉眼都睇得一清二楚。嗰份震撼真係令我瞠目結舌，回想起都仲心跳加速！

嗰刻我連手機都唔想攞出嚟影，腳架都唔想 setup，因為我唔想浪費任何一秒，只想用雙眼同心臟記住呢個奇蹟！😮💖（不過不得不讚 iPhone 嘅拍照功能，slow mode 3–10 秒已經拍得美如仙景！）

回想

今次真係好幸運，喺極黑環境加上 9pm–11pm 嘅黃金時段，北極光喺天上大開 party！綠色光幕有時似瀑布傾瀉，有時似小精靈跳舞，閃爍光影映照喺雪地上，衝擊我眼球一波接一波。佢好似綠色絲帶喺天幕翩翩起舞，仲不時有紅紫光點綴，勁似仙女灑魔法咁，靚到我差啲喊出嚟！🌈

🌌 北極光出現

天時地利人和先見到！

雖然芬蘭嘅北極光旺季由 9 月開始，但如果你想睇埋雪景，就要等到 12 月初先有。我哋喺 Levi 住咗 3 晚，只有 1 晚見到北極光，真係要天時地利人和！

要命中極光出現嘅區域，又要配合無雲夜空，先有機會見到嗰幕奇蹟。當你親眼望住綠光喺天幕翩翩起舞，嗰種感動真係會令人覺得：「人生真係無憾」！💫

📱 小貼士

記得裝「My Aurora Forecast & Alerts」App，係捕捉光影嘅救星，幫你即時掌握極光動態！

📚 北極光小知識

越黑越容易睇到

北極光係由太陽釋放嘅電子微粒，進入地球磁場後同高空氣體互動，產生絢麗光芒。太陽活動每約 11 年為一周期，活躍期內極光出現機率會提高。

喺芬蘭，最佳觀賞季節係每年 9 月至翌年 3 月，因為冬季夜長日短，黑夜時間多，自然更容易睇到極光。而且極光通常喺 晚上 9 點至凌晨 2 點 出現，配合 無雲、無光害、天氣晴朗，就有更高機會見到呢場天幕奇蹟！

 🏡 玻璃屋

如置身星河，浪漫到爆燈

今次我住嘅係 Northern Lights Ranch 嘅 Deluxe 房型——Sky View Cabins，配有私人戶外熱水池（jacuzzi），簡直就係奢華夢境嘅開始！✨

唔好以為喺酒店困住三日兩夜會悶到發霉，其實係 hea 得嚟又 chill 得嚟，仲忙到唔停手！（OMG 究竟我講緊咩！哈哈）

由於當地日照時間好短，下午 3 點左右就已經黑晒，所以我每日都要把握 11AM–3PM 嘅黃金時段，不停影相、影相、再影相！屋內屋外都係靚景，仲可以餵鹿，影到唔捨得停手！

除咗影相，另一個重頭戲就係浸 jacuzzi。試想像喺負 20 度嘅氣溫下，自己浸喺熱騰騰嘅水池入面，水氣裊裊升起，望住天上萬千星星閃爍，嗰種浪漫真係心臟怦怦跳，似足墮入愛河嘅畫面！😍

浸完又沖，沖完又浸，我都唔記得自己浸咗幾多次。浸到攰就返入屋，瞓喺床上抬頭一望，就係滿天閃爍嘅星海，靜靜地陪住我入夢，嗰種幸福感真係前所未有。

🍴 餐廳美食

馴鹿互動 暖胃又暖心！

講真，喺咁偏遠嘅秘境之中，我對酒店餐廳嘅期望唔算高，有得食已經好感恩！點知竟然有驚喜——有超萌馴鹿陪住食飯，真係暖胃又暖心！

我試咗佢哋嘅馴鹿肉，一咬落去就係滿滿嘅北歐風情。雖然唔太啱我口味，但同伴食到眉飛色舞，話配埋酸甜濃郁嘅野莓醬，肉質即刻升級，味道更有層次！😋

仲有一款我超鍾意嘅當地特色——蘑菇湯。熱辣辣嘅湯底帶住濃濃菌香，飲落去好似畀人攬住咁，暖到心入面都融晒！🍜

🎁 酒店免費體驗

馴鹿 + 浪漫 + Chill + 方便

最吸引我嘅，唔係食物，而係餐廳旁邊嘅馴鹿圍欄！隔住玻璃望住兩隻毛茸茸嘅馴鹿，圓碌碌大眼加傻氣食相，真係萌到我心都溶化！🐾

入住期間仲可以免費餵鹿，我親手餵咗佢哋 N 次，見住佢哋只揀最嫩嘅青苔嚟食，伸長脖仔搶食嘅模樣真係好治癒，笑到我出眼淚！😄

酒店原本有個超夢幻嘅心形溜冰場，免費開放俾住客。不過我哋去嗰陣啱啱維修緊，無得玩有啲可惜。單睇相都覺得浪漫爆燈，簡直係求婚場景級別！

仲有免費 BBQ 設施！雖然我無 order 酒店提供嘅 BBQ food package，但見到住客自備食材嚟燒，氣氛 chill 到不得了！

酒店職員親切到好似識咗十幾年咁，真心讚！整個北歐之旅，無論係餐廳、聖誕老人村、超市職員，全都friendly、casual、又 smart 又細心，令人感覺好溫暖！

另外，酒店仲提供免費接駁車來回 Levi 市中心滑雪場，無車都可以玩得好暢快，方便到爆！🚌不過就算叫 Uber，15 分鐘車程幾百蚊，以歐洲物價嚟講都算合理。

❄️ 負20度難頂嗎？其實唔係！

我去 Levi 嗰陣啱啱撞正白雪皚皚嘅童話時段，氣溫介乎 -10°C 至 -24°C，鼻頭都凍到紅卜卜。但其實唔使驚，只要準備充足，絕對頂得住！

• 室內暖到好似三亞咁舒服
• 室外著齊防風外套 + 雪褲
• 仲可以浸 jacuzzi 暖身

所以整體感覺唔算太凍，反而係一種好 fresh 嘅冬日體驗，凍得嚟又好享受！❄️

🎬 值唔值得再去？絕對值得！

對住香港濕冷又灰沉嘅冬天，要感受厚厚白雪、雪松掛滿雪、雪花紛飛嘅夜晚，真係要飛去北歐先有！

• 踩喺雪地聽住「吱吱」聲
• 望住北極光喺天上跳舞
• 嗰種浪漫感覺，似足電影情節

我真係覺得值得一去再去，甚至想每年都去一次，畀自己沉醉喺呢個童話世界入面！

💖 總結

奢華 x 浪漫 x 大自然的天堂

Northern Lights Ranch 真係一個將奢華、浪漫同大自然奇觀完美融合嘅夢幻天堂！💖住喺玻璃屋入面，好似瞓喺星空之下，每晚都被滿天星海包圍；北極光靚到似天皇級表演，震撼得令人窒息；加埋同馴鹿互動，真係每一刻都充滿驚喜！🔥

無論你係同另一半甜到漏糖咁去追光，定係同三五知己喺雪地玩到唔捨得走，呢度都係宇宙級嘅完美之選！😍快啲 mark 低，拎行李飛去 Levi 啦，北極光喺度等緊你！✈️

😂小插曲

雪地畫龜的可愛小朋友

最搞笑係我隔離間獨立屋，聽到熟悉嘅廣東話，一家三口帶住大約三歲嘅小朋友嚟旅行。阿爸阿媽浸緊jacuzzi，阿仔就跑咗過嚟我哋雪地度畫龜，畫面超可愛，笑到我心都溶化！