遊日|東京銀座新星！鮨よしかわ勝銀座 Omakase 親試🐉七龍珠壽司超吸睛📸＋隱藏版驚喜菜式逐件爆！🍣

🌙 銀座深夜嘅味蕾冒險

東京trip點少得一場靚Omakase體驗？😍 小編搵到2025年新開嘅【鮨よしかわ勝銀座】（Sushi Yoshikawa Katsu Ginza），主打「大將おまかせコース」，用當季食材，無論擺盤定味道都極之講究，精緻度真係爆燈✨！

最吸引小編嘅，絕對係佢哋超豪氣、富感十足嘅🐉名物「七龍珠」——よしかわ特製太卷！🍣 太卷將中Toro、海膽同七粒金黃色醃蛋黃豪華卷埋一齊，賣相震撼，顏色層次分明，真係一上枱就令人目定口呆，印象深刻！📸

小編私心覺得，呢度絕對係IG打卡聖地！影低嗰「七粒龍珠」post上網，保證朋友無限like同問「邊度搵到咁正嘅店」！💖

小編早一個星期喺官網火速book咗8:30pm嘅晚市，銀座血併完直奔呢度，，嚟一場味蕾同視覺嘅雙重震撼。點知呢餐真係食到我心花怒放，同意想不到的驚喜～💖

大家一齊睇吓呢間壽司店係咪真係值得你下次東京行程入面排入必食清單！

CP值爆燈嘅Omakase之旅

餐廳提醒要準時，小編8:15pm左右去到，位於銀座6丁目一棟商業大廈，行樓梯上一層，環境有啲似香港嘅工廈feel！😅 一樓雖然望到樓下大街，但整體感覺幾密閉，唔係一般商場或地舖餐廳嘅氣派。九月東京熱到爆，門外有2、3組食客排緊隊，等咗10分鐘熱到出晒汗，小編強烈建議自備小風扇！🌬️

去到差唔多8點25分，職員就開門叫我哋入去。一入門口，成間餐廳燈光偏暗，感覺好有私密感。裡面有張好長嘅L字型吧枱，14個位，可以近距離睇師傅落刀真係好有睇頭！成個氣氛又靜又高雅，坐低嗰刻已經覺得好有儀式感，沉浸感爆晒燈！😎

 當晚有兩個師傅，一位負責8位食客，一位負責6位。我哋嗰位師傅笑容超親切，開場問我哋識唔識講日文。小編日文零分，但師傅識少少中文同英文，溝通完全無問題，仲好有耐性同我哋講解每道菜！😊

晚市Omakase有兩個套餐揀：一個係唔包飲品嘅¥13,200（約HK$725），另一個就係包任飲嘅¥19,800（約HK$1,087）。食物內容一樣都係十道菜左右，食材夠新鮮，擺盤又夠晒吸睛，食到一半已經覺得抵食，值回票價！

開胃小菜：Fusion得嚟驚喜連連

一開場，師傅上咗幾款壽司同前菜，已經畀我好大驚喜：

• 鰹魚瞬間煙燻刺身鹽醬：煙燻香氣撲鼻，鹽醬將紅肉嘅鮮美鎖住，入口緊實又 juicy，令人一試難忘！
• 水章魚醋拌菜：柔軟嘅水章魚配上海帶同黃瓜，點綴百香果醬嘅酸甜，清爽開胃，完美為整餐揭開序幕。
• 炙燒鯖魚手卷：一上枱就聞到陣陣炙燒香氣，壽司飯帶微酸，海苔又香又脆，幾種味道喺口中交融，層次豐富，好有驚喜！

同一般壽司店比，呢度嘅Fusion元素多咗創意，食落完全唔單調，已經畀我超高期待！

重頭戲：七龍珠太卷🐉

終於嚟到全晚最期待嘅MVP——🐉七龍珠太卷🐉！師傅用七粒金黃色、圓碌碌、色澤飽滿嘅醃蛋黃，造型真係同《七龍珠》入面嗰七粒龍珠一模一樣！再配上海膽、中拖羅、赤身等頂級食材，卷好之後精準切成七件，仲特登砌成一朵花形圖案擺上碟，打卡感真係爆晒燈！📸

味道方面，海膽鮮甜濃郁，蛋黃滑到好似喺口入面溶咗咁，配埋吞拿魚嘅油脂感，幸福感即刻湧晒上嚟！不過講真，整體感覺係儀式感重過味蕾享受，將滿滿嘅高級食材堆埋一齊，打卡就真係一流，靚到唔影唔得！📸

味道方面就未至於驚為天人，但視覺震撼絕對夠晒誠意，嚟打個咭、呃like、同朋友吹水，絕對值回票價！💯

不過，呢part有個小插曲：師傅切完壽司之後，會問現場8位食客邊個想要最大嗰兩件。小編天生鵪鶉性格，點敢出聲爭？😅 結果隔籬枱嗰對台灣人同日本人好雀躍咁舉手，順利攞到最大件！我當時hang機咗，完全反應唔切，事後真係有啲後悔，點解唔勇敢啲舉手拎件大啲嘅打卡壽司？

講真，normal size其實份量已經好夠，但講到IG打卡，梗係大件啲更吸睛啦！😂 而且，作為一個畀錢嚟享受嘅食客，嗰刻無唸過要爭取一件壽司，感覺好似返工搶project咁，真係有啲怪怪哋。

所以我真心建議餐廳可以改進呢個環節，例如整個「盲盒抽籤」玩法，畀食客抽中最大件就有驚喜，氣氛又輕鬆啲，唔使尷尬又唔使爭，打卡都打得開心啲！🎁

🍥 其他菜式同甜品：驚喜遠超七龍珠

估唔到最令我驚喜嘅，竟然唔係七龍珠太卷，反而係幾道冇預期但超出水準嘅菜式，完全搶晒風頭：

• 酥脆鰻魚紫菜卷：外層燒到香脆，入面鬆軟又多汁，配埋甜辣醬同壽司飯，口感同味道都啱啱好，食完我忍唔住即刻講：「呢個真係好正！」😄
• 秋刀魚壽司：我人生第一次食到完全唔腥嘅秋刀魚！入口清爽鮮甜，魚肉嫩滑得嚟又有質感，簡直顛覆咗我一直以嚟對秋刀魚嘅印象！
• 甜品-夏威夷果仁藍莓慕絲：果仁香氣夠晒濃，配埋藍莓嘅微酸，甜得嚟唔膩，連我呢個平時唔太食甜品嘅人都食到舔咀唇，真係完美收尾！😋

對食材嘅執着

食完之後小編先做功課，先發現原來餐廳對食材真係落足心機：

• 壽司飯係用經過六年酒糟陳釀嘅紅醋製成，酸味溫和又有層次，唔會搶味，反而更能帶出吉川食材嘅鮮味🍶。
• 海苔就更加唔簡單——嚟自群馬縣一間有150年歷史嘅老字號公司，係一種特別品種，帶有濃郁海洋香氣，入口即化，配手卷真係香到不得了🌊。

唔怪得米飯同紫菜都咁好味，原來背後真係有料到！

服務同細節：貼心但有小瑕疵

一開場，侍應會畀你一張飲品Menu，建議每人點杯飲品（日本餐廳文化，唔點有啲唔慣）。我點咗杯清酒，價錢合理，配壽司好match。不過，充滿「歷史感」嘅飲品Menu真係有啲問題，師傅一邊處理生熟食材一邊拎呢本Menu畀我哋點飲品，感覺有啲唔衛生，建議餐廳更新Menu同分開處理食材同Menu，會更乾淨專業。😉除咗呢點，師傅服務超貼心，會問你喜唔喜歡某啲口味，仲同我哋傾計，氣氛好輕鬆。環境略為密閉，夏天室外等位熱到辛苦，記得帶風扇仔！

HK$725嘅銀座夢幻體驗

總括嚟講，鮨よしかわ勝銀座真係一間將傳統同創新玩到出神入化嘅Omakase壽司店！¥13,200（約HK$725）喺銀座嚟講真係抵到笑，七龍珠壽司視覺震撼，絕對係全晚MVP，但講真，炙燒鯖魚手卷同酥脆鰻魚紫菜真係搶晒鏡，味道同層次都令人驚喜，貼心服務又加分！😍

雖然等位熱到出汗、環境衛生有啲甩漏，加埋「爭大件壽司」嗰幕有啲尷尬，但整體體驗依然係高分！特別係鍾意打卡、鍾意試新奇菜式嘅朋友，呢度絕對值得黎東京打個咭！

📌 實用資訊｜鮨 よしかわ 銀座

📍店名：鮨 よしかわ 銀座
（⚠️記住唔好去錯隔離嗰間「鮨 よしかわ 勝別邸」，只得7個位，主打私密體驗，晚市Omakase ¥22,200–¥30,800）

📍地址：〒104-0061 東京都中央區銀座6丁目12-15 いちご銀座612大廈 2樓C室

🚇交通

• 銀座站（銀座線／丸之內線／日比谷線）A3出口步行約2分鐘
• 東銀座站（日比谷線／都營淺草線）A1出口步行約3分鐘

💰價錢

• 晚市廚市發辦套餐 ¥13,200（約HK$725，唔包飲品）
• 或 ¥19,800（約HK$1,087，包任飲）
• ⚠️無午市供應

🕰️場次

每日分2–3個時段，建議揀8:30pm場次，啱啱銀座百貨8pm關門，Shopping完食飯一條龍！

📲預約

需提前網上訂位

• 官網：https://sushi-yoshikawa.jp/
• Tabelog：tabelog.com/tw/tokyo/A1301/A130101/13304245

💡貼士

• 夏天去記得帶小風扇，等位真係熱到出汗🥵
• 打卡七龍珠記得用 #七龍珠壽司 或 #七龍珠太卷上IG，超多靚相！📷