東張|情癡女巴迷狂追 不堪纏擾車長Alex離職

入職首3月即遇狂迷

Alex 於去年(2024年)3月加入九巴，原本只係一名普通巴士車長，點知入職唔夠3個月，就遇到一名19歲嘅女巴迷。
起初，女巴迷只係影相。但隨住時間推移，女巴迷嘅行為就越嚟越過份。
呢名女巴迷每日都喺 Alex返工嘅車站附近徘徊，影相、拍片，甚至騎單車追逐巴士。佢嘅行為唔單止影響 Alex 嘅駕駛，更可能危乘客同途人嘅人身安全。

滋擾行為 變本加厲

但佢並未停止行為，甚至變本加厲。
佢唔單止長期跟蹤 Alex，仲將佢嘅全名、肖像、住址同埋家庭狀況，喺社交平台上公開，令Alex感到極大困擾。佢嘅行為，其實已經好有可能干犯《起底罪》。即使Alex 曾經警告佢，但情況仍然持續。

起底=刑事罪行

根據香港個人資料私隱專員公署嘅資料指出，起底罪行喺屬於刑事罪行，性質嚴重，罰則最高可以達到100萬同埋監禁5年。不過，似乎呢位女巴迷冇將法律放喺眼內。

突如其來 絕地表白

喺《東張西望》節目中，女巴迷趁Alex休息果時向佢表白：「其實我鍾意咗你。」但Alex直接拒絕：「你鍾意咗我關我x事？」表示自己對佢完全冇好感。
呢一幕唔止女巴迷，亦都令觀眾同為震驚。網民熱烈討論痴纏行為應唔應該被容忍。

無誠意道歉 無奈結局

節目最後安排女巴迷向Alex道歉，但整個過程女巴迷仍然一臉嘻皮笑臉，令Alex直言佢冇誠意，表明唔接受佢嘅道歉。
結局更令人無奈嘅係，Alex最終選擇離職。

社會反應

事件曝光後，網民普遍認為，女巴迷嘅滋擾行為令車長承受住巨大壓力，甚至最終影響到佢嘅職業生涯，導致佢被迫辭職，令人惋惜。

• 「就算佢靚女都唔得啦，呢 D 遲早會係恐怖情人！」——強調滋擾行為不可合理化。
• 「不停影相又唔知幾時彈出嚟，仲要起人底，巴士司機喺呢啲無形壓力下隨時會有意外發生。」——指出滋擾行為可能影響公眾安全。
• 「最後如果比佢影響到冇左份工，多得佢唔少。」——反映滋擾行為可能影響當事人職業生涯。

巴士公司冇有回應

事件曝光後，相關傳媒曾向Alex任職巴士公司查詢，但公司回覆指「有關車長現已離職，九巴不便評論事件。」，顯示巴士公司未有進一步介入或回應事件。

5news點睇

雖然事件引起社會廣泛討論，但巴士公司未有就如何處理類似事件、點樣保護員工作出詳細交代。部分市民認為公司應該提供更多保障，例如加強員工私隱保護措施、為受滋擾員工提供支援，避免事件重演。

事件看似已經告一段落，但對社會嘅影響仍然深遠。今次事件令公眾關注滋擾行為對前線工作者嘅生活同工作嘅影響，同時亦令大家思考機構喺員工保護方面應該承擔嘅責任係咪足夠。