Hermès|新客喺夏威夷都可以低配拎 Birkin 25？48 小時 1:1.5 配比實測，點解近年成為美國「隱藏熱點」

近年愈來愈多亞洲網民分享，指 Hermès 夏威夷分店（Hawaii Ala Moana Center）被視為相對較容易入手Birkin 嘅地點之一，甚至有新客可以做到 低於 1:1.5 嘅配貨比例。相比香港、中國內地或者美國本土一線城市，動輒要 1:2-1:4 甚至以上嘅配比，相關經驗自然引起唔少關注。

今次文章整理一位網民於 2026 年一月 分享、喺 48 小時內成功入手 Birkin 25 大象灰 嘅個案，並配合價格數據、唔同地區嘅配貨情況，以及美國網民嘅回應，分析點解夏威夷會被視為一間「特別友善」嘅 Hermès 分店。 

夏威夷 48 小時入手 Birkin 25：流程重點整理

呢位帖主原本曾經喺美國本土一線洛杉磯比佛利山（Beverly Hills）嘗試配貨，但整體體驗並唔理想，之後喺朋友建議之下轉到夏威夷一試。即使本身已有美國 profile，仍然選擇喺當地重新開新帳戶，實測後認為對配貨進度會較為有利。

Day 1：新帳戶＋即日配貨

進店之後即場開新帳戶，並喺同一日完成第一輪配貨，配貨內容主要集中喺首飾同家居類別。過程中，SA 清楚表示現階段配額已經足夠，並記低帖主嘅 Birkin wishlist，同時詢問離境時間，暗示短期內有機會再聯絡。

Day 2：等待期

第二日未有即時消息，屬於唔少配貨客人都會遇到嘅「空窗期」。

Day 3：成功取袋

第三日接獲 SA 通知，可以即日返店。最終喺店內完成交易，成功入手 Birkin 25 大象灰 Togo 皮、銀扣，同時額外購入一對鞋（並非必要條件）。

整個過程由開帳到取袋，實際所需時間不足 48 小時。 

夏威夷 Birkin 25 價格與配貨比例

帖主分享嘅實際支出如下：

• Birkin 25（USD）：13,500
• 配貨金額（約）：20,000
• 整體配比：約 1:1.48（低於 1:1.5）

喺現時全球 Hermès 配貨環境之下，對新客而言屬於相當罕見嘅情況。 

2025 vs 2026：Birkin 25 官方定價變化（美元 vs 港幣）

加幅分析：

• 美元加幅：約 +6.3%
• 港幣加幅：約 +6.7%

即使 2026 年 Birkin 25 再度加價，實際比較可見，美國同香港嘅官方加幅同樣約為 6–7%，兩地升幅並唔算有明顯差距。

如果單純由貨品定價作換算，以 USD : HKD 約 1 : 7.75 計算，美國定價 USD 13,500 折合約 HKD 104,625，而香港 2026 年定價則為 HKD 103,500，兩者相差不足 HKD 1,200。

換言之，如果單純淨係睇手袋本身嘅定價，美國其實冇乜明顯價格優勢；夏威夷之所以會引起關注，更多係來自市場觀察——整體配貨比例同實際入手難度，確實同其他地區有一定差別。

延伸閱讀：Hermès 歷年加價與價格差異整理

如對 Hermès 價格走勢有興趣，5news 亦有專文整理各地價格與歷年加幅：

Hermès|2026大中華及全球地區價格(持續更新:20260123)

踏入 2026 年初，唔少奢侈品牌先後喺唔同市場調整定價，Hermès 嘅手袋價格走勢亦再次成為討論焦點。由於部分市場嘅最新價格未有統一公開，現時流傳嘅價格資訊，多數來自網民分享同市場整理。 整合 2023 年至 2026 年期間，Hermès 多款手袋喺香港、中國內地同同世界各地區嘅相關價格資料，仲可以按即日匯率換算港幣價格，方便讀者快速對照唔同市場嘅價格變化，作資料參考之用。

5News - 5只新聞咁簡單！5News編輯部

呢個低配比引嚟咁多亞洲買家回應？

如果將夏威夷嘅實際配貨比例，同亞洲多地網民分享嘅經驗作比較，差異就會更加明顯。

以中國市場為例，不少網民指出，Birkin 25 嘅常見配貨模式為：

• 包價約 CNY 11 萬
• 配貨約 CNY 18–28 萬不等
• 整體支出約 CNY 29–39 萬
• 配貨比例普遍高於 1:2.5 至 1:3 以上

而喺香港市場，雖然個別月份或者分店會出現較「順」嘅個案，但整體而言，新客或者非高消費客戶要拎 Birkin 25，配貨比例多數仍然需要約 1:2 或以上，而且配貨周期未必可以喺短時間內完成。

相比之下，帖主喺夏威夷嘅個案中，以 約 1:1.48 嘅配比，並喺短時間內完成交易，自然引起大量亞洲買家討論同回應。焦點唔在於總金額嘅絕對值，而係「要用幾多非袋消費，先可以換到一個較為明確嘅結果」。

美國網民點睇？夏威夷成為「策略性選項」

唔少美國網民亦有分享，指喺Beverly Hills、灣區等一線城市配貨節奏較慢，心理壓力亦相對較大；反而夏威夷因為客源結構唔同，以旅客為主，SA 對短期 wishlist 嘅處理會相對直接。 

亦有美國買家表示，已經將夏威夷變成一年幾次嘅固定「配貨＋度假」行程，一方面嘗試配袋，另一方面亦當作短途放鬆。

不過，對香港買家嚟講，夏威夷係咪真係可行，始終都要計埋實際時間同成本。

由香港直飛檀香山（Honolulu），飛行時間大約 12 個鐘，直航來回都已經係一次長途行程，坦白講，並唔適合當成「三日兩夜快閃拎袋」咁玩。

一般嚟講，夏威夷會比較適合以下情況嘅買家：

• 本身已有較長假期，或者本來就計劃去美國旅行
• 可以接受將配貨當成行程其中一環，而唔係唯一目的
• 心態上唔係一定要即時有結果，而係嘗試唔同市場嘅配貨策略

相對之下，如果香港買家係純粹為咗拎袋而特登飛夏威夷，咁時間成本、機票同住宿開支其實都要一齊計落去。否則就算當地配比較低，實際嘅總成本，都未必一定比留喺香港或者去鄰近市場更有優勢。

夏威夷 Hermès 分店資料

• 分店名稱：Hermès Ala Moana Center
• 地址：1450 Ala Moana Boulevard, Honolulu, HI 96814, United States

總結：夏威夷適合邊類型買家？

綜合多個網民分享同價格分析，夏威夷並非「保證有袋」嘅地點，但喺以下情況下，確實具備一定吸引力：

• 願意接受旅遊＋配貨並行
• 希望控制配貨比例，而唔追求極高消費
• 對顏色同皮質有清晰偏好，能夠清楚表達 wishlist
• 唔想長期被單一城市嘅配貨節奏綁住

對香港或者亞洲買家而言，夏威夷更似一個 風險相對可控、彈性較高嘅選項，而唔係傳統一線城市以外嘅「捷徑」。