LABUBU|3.0 瘋狂大補貨+實名制

2025年6月20日更新

LABUBU 3.0實名制

粉絲注意！popmart 終於出實名制預約！🔗
【THE MONSTERS Big into Energy 搪膠毛絨掛件系列-Restock】

• 今日開始預約: 2025年6月20日(五) 12:00pm
• 買貨時間: 6月21日(六) - 22日(日)，到尖沙咀門市
• 目標: 「L-A-B-U-LA-BU!」💫
• 預約連結: https://m.popmart.com/en-HK/store-apppointment-event/5
• 價錢: HK$720/盒
• 提示: 唔好miss！詳情查 POP MART 頁面！

全球熱潮

LABUBU 3.0唔只喺香港同國內火紅，仲席捲東南亞、歐洲同北美。Pop Mart 2025年第一季報告話，海外收入升咗近480%，北美係增長最快嘅市場，LABUBU係最大功臣。

6.18瘋狂大補貨

Pop Mart(泡泡瑪特)香港官網喺6月18號晏晝開始連環補貨(大補貨)，消息指國內全平台賣咗超過200萬隻LABUBU 3.0，淘寶單一平台賣出40幾萬隻，預計發貨日間仲由6月28號延到9月22號，需求真係爆棚！

二手市場：價格大跌

價格急劇波動

6.18補貨前，「本我ID」隱藏款炒到5500蚊一隻，「幸運Luck」款賣600蚊一隻；但補貨後大陸二手價跌到原價約人仔600一端(一端係一盒6隻 人仔@99)。

炒作泡沫爆破

今次補貨好似一針拮爆炒作泡沫，有人話「LABUBU 3.0 Big into Energy Series 前方高能」(THE MONSTERS Big into Energy Series-Vinyl Plush Pendant Blind Box)跌落神壇。炒家同「黃牛」蝕大本，但「本我ID」隱藏款喺StockX仲叫緊2950蚊一隻。

網民反應：喜憂參半

搶到6月28號發貨嘅興奮

有網民喺香港官網搶到6月28號發貨嘅LABUBU 3.0，開心Share：「蹲了官網差不多一個月終於買到了我想要的啦，之前只想要坐坐系列，只能從別人手上買，昨晚問了黃牛紫色幸運多少錢他說600，嚇到我的小心肝都跑掉！結果今天我就買到了」✌️😳

9月發貨嫌太耐

有網民搶到但9月先發貨，哭訴等太長：「#labubu 3.0香港官網搶了一端9月份的，太久了，隨時都想取消訂單😂😭」，長發貨期令粉絲唔耐煩。

品牌策略調整 饑餓營銷

饑餓營銷策略

Pop Mart用盲盒嘅隨機性同限量發售，刺激「賭仔心理」同「跟風效應」，特別吸引年輕人。研究話，盲盒嘅稀缺性係LABUBU熱潮嘅核心(資料來源：鉅亨網新聞中心)。

供應調整

6.18大補貨顯示Pop Mart急需借618節，平衡真粉需求同挽救炒作帶嚟嘅負面品牌形象，但長遠要小心消費者疲勞。

拍賣市價過百萬 創新紀錄

6月6號，北京永樂拍賣行搞咗全球首場LABUBU專場，一隻4呎高嘅薄荷綠LABUBU以近124萬人仔(約135萬蚊)成交，證明LABUBU已經唔係普通玩具，而係高價收藏品(資料來源：THE VALUE)。

現貨vs期貨 價格走勢

LABUBU 3.0現貨價仍然高企，反觀9月期貨比起現貨差唔多跌咗一半，反映出市場預期供貨多導致炒作降溫。

📌 現貨價

現時全新LABUBU 3.0原條(端)市場價約為2600蚊，現貨供應仍然有限，要即刻入手嘅買家唯有肉痛一下。

📌 9月期貨價

隨住粉絲預期供貨越嚟越多，9月預售價格已跌到1350蚊，比現貨平咗$1250，即係大約52%，反映市場供求可能轉趨平穩，價格或者會再調整。

總結

LABUBU 3.0喺2025年6月嘅市場表現又熱又亂。大補貨令二手價崩盤，但LABUBU嘅全球影響力同收藏價值仲好強。香港官網嘅補貨畀真粉絲平價入手嘅機會，但9月嘅長預售期惹嚟唔少怨言。Pop Mart要喺饑餓營銷同穩定供應間搵平衡，先可以長遠保持吸引力。

睇嚟LABUBU 3.0熱潮開始降溫，啲價格一路跌，真係考驗大家嘅耐性！如果等多幾個月，可能可以更抵入手，但又怕錯過咗最後嘅捧場潮？💰

今次618大放貨，你有冇成功搶到？定係見到黃牛價直線下降，決定等多陣再入手？而家LABUBU 3.0由高峰期嘅2800元一路跌到現貨2600，再到9月期貨只需1350，大家都開始有心理準備，呢個系列唔再係「炒到飛起」咁誇張。

你自己又點睇？會趁低吸納定係再睇定啲？📉😆